بیوی کی مہارت یا مافیا کی طاقت کا کمال۔ مڈل کی بنیاد پر ٹیوٹا کے ادارے میں ڈپلومہ کیا اور 6 ماہ بعد بی اے کی بنیاد پر ٹیوٹا میں انسٹرکٹر کی نوکری لے لی۔
بہاولنگر ( سیف الرحمن سے) بیوی کی مہارت یا مافیا کی طاقت کا کمال۔ 6 ماہ میں مڈل سے بی اے تک کا سفر۔ مڈل کی بنیاد پر ٹیوٹا کے ادارے میں ڈپلومہ کیا اور 6 ماہ بعد بی اے کی بنیاد پر ٹیوٹا میں نوکری لے لی۔
تفصیلات کے مطابق ٹیوٹا بہاولنگر میں تعینات کرپشن مافیا کے کنگ اسسٹنٹ ڈائریکٹر فنانس شاہد محمود کی بیوی نے ٹیوٹا کے ادارے میں بیوٹیشن ڈپلومہ کلاس میں داخلہ لیتے وقت اپنی تعلیمی قابلیت مڈل ظاہر کی اور غریب بچوں کے لیے مختص وظیفہ وصول کیا۔6 ماہ کے ڈپلومہ کورس کی تکمیل کے فوری بعد بی اے کی بنیاد پر ٹیوٹا بہاولنگر کے ہی ایک دوسرے ادارے میں بغیر اشتہار و ویکینسی ایڈورٹائزنگ، بغیر انٹرویو انسٹرکٹر کی نوکری حاصل کر لی۔
اسسٹنٹ ڈائریکٹر فنانس شاہد محمود کی بیوی کو بطور انسٹرکٹر نوکری دیتے وقت ٹیوٹا کے تمام قواعد و ضوابط کو بالائے طاق رکھ دیا گیا۔ بغیر اشتہار کے کسی کو بھی نوکری دینا بنیادی انسانی حقوق کی خلاف ورزی ہے۔ انتہائی حیرت کی بات ہے کہ سارا نظام کمپیوٹرائزڈ کرنے کے دعوے دار ادارے ٹیوٹا میں داخلہ اور نوکری جعل سازی سے حاصل کرنے والی خاتون کی کوئی پوچھ گچھ نہیں کی گئی۔ بلکہ ٹیوٹا کے ڈپلومہ ہولڈرز کو ملازمت کی تلاش میں مدد دینے کے لیے بنائے گئے آن لائن ویب پورٹل پر بھی اسسٹنٹ ڈائریکٹر فنانس شاہد محمود کی بیوی کا نام بطور بے روزگار پوسٹ کر دیا گیا تاکہ خاتون کے لیے مناسب نوکری تلاش کی جا سکے۔
یاد رہے جعل سازی اور غلط بیانی کرنے والی خاتون کے شوہر اور ٹیوٹا بہاولنگر کے کرپشن کنگ شاہد محمود نے اپنی تعلیمی قابلیت میٹرک لکھ کر ٹیوٹا چشتیاں کے ہی ایک ادارے سے کمپیوٹر کا ڈپلومہ حاصل کرنے کے ساتھ ساتھ غریب طالب علموں کے لیے مختص وظیفہ بھی حاصل کیا جبکہ موصوف اسی ادارے میں ایم بی اے کی بنیاد پر افسر بھی تھے۔ موصوف اسسٹنٹ ڈائریکٹر فنانس کا ڈپلومہ انکوائری کے نتیجے میں ٹریڈ ٹیسٹنگ بورڈ نے کینسل کر دیا تھا۔
میاں بیوی دونوں ہی جعل سازی اور غلط بیانی کے ذریعے ڈپلومہ حاصل کرنے میں کامیاب ہوئے ہیں۔ دونوں نے ہی داخلہ کے وقت اپنی تعلیمی قابلیت غلط لکھی اور وظیفہ خوری کی۔ عوامی، سیاسی و سماجی حلقوں نے وزیر اعلیٰ پنجاب سے مطالبہ کیا ہے کہ اسسٹنٹ ڈائریکٹر فنانس شاہد محمود کی بیوی کی اسناد کی ویریفیکیشن کروائی جائے، وصول کردہ تنخواہیں سرکاری خزانے میں جمع کروائی جائیں اور ٹیوٹا بہاولنگر میں ہونے والی لوٹ مار اور کرپشن کی غیر جانبدارانہ تحقیقات کروائی جائیں۔